QUISQUIS COMPOSITO. — Metrum 4
"Whoso it be that is cleer of vertue, sad and wel ordynat of
lyvynge, that hath put under fote the proude wierdes, and loketh
upryght
upon either fortune, he may holden his chere
undesconfited. The rage ne the manaces of the see, commoevynge
or chasynge upward hete fro the botme, ne schal nat moeve that
man. Ne the unstable mowntaigne that highte Visevus, that
writhith out thurw his brokene chemeneyes smokynge fieres, ne the
wey of thonderleit, that is wont to smyten hye toures, ne schal
nat moeve that man. Wharto thanne, o wrecches, drede ye tirauntz
that ben wode and felenous withouten ony strengthe? Hope aftir
no thyng, ne drede nat; and so schaltow desarmen the ire of
thilke unmyghty tiraunt. But whoso that, qwakynge, dredeth or
desireth thyng that nys noght stable of his ryght, that man that
so dooth hath cast awey his scheeld, and is remoeved from his
place, and enlaceth hym in the cheyne with whiche he mai ben
drawen.
